اسرائیل میں گزشتہ 10 ماہ کے دوران جمعرات کو پہلی بار کورونا وائرس سے کسی شہری کی ہلاکت رپورٹ نہیں ہوئی ہے۔
اسرائیل کی وزارت صحت کے مطابق جمعرات کو 35 ہزار سے زائد ٹیسٹ کیے گئے جس میں سے 129 افراد میں وائرس کی تشخیص ہوئی یوں مثبت کیسز کی شرح 0.4 فیصد ہے۔
غیرملکی خبررساں ادارے کے مطابق اسرائیل میں اس دوران کورونا سے کسی بھی شہری کی ہلاکت رپورٹ نہیں ہوئی ہے جبکہ ایسا 10 ماہ میں پہلی بار ہوا ہے۔
اس سے قبل 299 روز قبل 29 جون 2020 کو اسرائیل میں کورونا سے کوئی ہلاکت نہیں ہوئی تھی۔
رپورٹس کے مطابق اسرائیل کی 80 فیصد آبادی کی ویکسینیشن بھی مکمل ہوچکی ہے جس کے باعث کیسز کی تعداد بھی بتدریج کم ہورہی ہے۔
اس کے علاوہ کورونا مریضوں کیلئے اسپتالوں میں بنائے گئے وارڈز بھی بند کردیے گئے ہیں۔